أمك

كتير منا بيختلف مع أمه ..كتير ايه دا كلنا تقريبا ودا طبيعى بسبب اختلاف الاجيال وطريقة التفكير وظروف المعيشة وحاجات كتير

وعاوزة اركز شوية على طرق الاختلاف انا وكل اللى اعرفهم اخرهم بيزعقوا شوية ويقعد يهلفت فى الكلام وفى ناس بتطاول اكتر من كدا بس مش عاوزة اركز معاهم لان دول الكلام مابقاش ينفع معاه

نرجع تانى للى بيزعق ويهلفت فى الكلام ومنهم انا (انا مش ملاك يعنى) انا عارفة ان كل واحد فينا بيعشق ماماته وما بستحملش عليها الهوا  بس انا عاوزة اسألك شوية أسئلة وياريت كل واحد فينا يقعد مع نفسه ويركز فى الاسئلة دى

عمرك دعيت لمامتك وانت بتصلى؟

عمرك دعيت ربنا انه يعينك على بر مامتك؟

عمرك قعدت مع مامتك تتكلم فى اهتمامتها مش اهتمامتك ؟

عمرك التمست العذر لمامتك فى حاجة هيا بتعملها وبضايقك؟

عمرك فكرت فى الظروف اللى مرت بيها مامتك قبل كدا وضايقتها؟

لما بتتخانق مع مامتك بترجع بعد اد ايه علشان تصالحها ولا ما بتصالحاش اصلا؟

عمرك فكرت وانت بتجيبلها هدية هاتعجبها اد ايه ولا ما بتجبش اصلا؟

عمرك سمعتها بتقول محتاجة حاجة فنزلت تشتريها ؟

عمرك فكرت فى المسئولية اللى شايلاها وقررت انك تشيل معاها شوية؟

عمرك فكرت وانت بتختار زوجة او بتختارى زوج هواو هى هايكون بار بمامتك اد ايه؟

عمرك فكرت فى تصرفاتك هاتأثر ازاى على مامتك لو عرفتها؟

عمرك فكرت كدا وانت قاعد بتدخن ولا بتشيش لو مامتك شافتك هاتنبسط ولا هاتزعل ولو هاتزعل اد ايه ؟

طيب لو هيا توفت...عمرك فكرت تعمل حاجة تتحط فى ميزان حساناتها؟؟

عمرك سألت الله لها أن يرزقها حسن الخاتمة؟

عمرك ؟ وعمرك وعمرك؟ 

اسئلة كتير بس انا هاكتفى بدول يا جماعة الموضوع كبييييييييييييييييييييييييييييييييييييييييييييير اوى

الله سبحانه وتعالى أمرنا ببر الوالدين...ربنا سبحانه وتعالى اتى ببر الوالدين بعد الايمان به فقال جلَّ شأنه: {وقضى ربك أن لا تعبدوا إلا إياه وبالوالدين إحساناً إما يبلغن عندك الكبر أحدهما أو كلاهما فلا تقل لهما أف ولا تنهرهما وقل لهما قولاً كريماً واخفض لهما جناح الذل من الرحمة وقل ربي ارحمهما كما ربياني صغيراً} [الإسراء: 23]. ولا تقل لهما أف شوف انت بقى بتقول كام أف

وقال تعالى: {واعبدوا الله ولا تشركوا به شيئًا وبالوالدين إحسانًا}[النساء: 36].

 وقال تعالى: {ووصينا الإنسان بوالديه حملته أمه وهنًا على وهن وفصاله في عامين أن اشكر لي ولوالديك إلى المصير} [لقمان: 14].

عن أبي هريرة عَنْ النَّبِيِّ صَلَّى اللَّهُ عَلَيْهِ وَسَلَّمَ قَالَ رَغِمَ أَنْفُ ثُمَّ رَغِمَ أَنْفُ ثُمَّ رَغِمَ أَنْفُ قِيلَ مَنْ يَا رَسُولَ اللَّهِ قَالَ مَنْ أَدْرَكَ أَبَوَيْهِ عِنْدَ الْكِبَرِ أَحَدَهُمَا أَوْ كِلَيْهِمَا فَلَمْ يَدْخُلْ الْجَنَّةَ . صحيح مسلم 4627

يا جماعة بجد الموضوع كبير اوى انت ممكن تترمى فى جهنم علشان زعلت امك وكسرت بخاطرها وانت مش دريان .. وافتكر انك كما تدين تدان والديان لا يمون وكل اللى انت بتعمله دلوقت هايطلع على عينك لما تجيب اولاد فبروا أمكم وابوكم تلاقوا ولادكم بيبروكم
ربنا يرزقنى واياكم بر الوالدين أحياء وأموات "ربى اعفو وأغفر لأمى وأبى وارحم ابى وادخله جنتك والحقنا به وبالصالحين على خير" "اللهم اصلح قلب أمى وأصلح قلوبنا جميعا واعنا على برها وبر أبى"