نظرية المسافة

السلام عليكم ورحمة الله وبركاته 

النهاردة هاتكلم عن حاجة بشوفها مهمة جدا جدا جدا فى تعاملتنا اليومية ومع ان النظرية دى شىء بيطالبنا بتطبيقه الدين والاخلاق والذوق والاتيكيت الا ان كتير مش بيطبقوها -للتوضيح فقط اسم النظرية ده من اختراعى يعنى محدش يروح يدور على الاسم فى جوجل ولا حاجة :D-  وبما اننا بنتكلم فى نظرية فهاوضحها بالطريقة اللى كنا بناخد بيها النظريات اثناء الدراسة

نص النظرية:

تنص النظرية على

"ان المسافة بينك وبين الأخر تتناسب طرديا مع مدى قربك به/بها ... وهذه المسافة لا ترتبط ابدا بكون الاخر دا من نفس نوعك-ذكر او انثى- او لا" 

والشرح فى الامثلة :D

الأمثلة:

بما انى معنديش عربية وبركب ميكروباظات :D ومترو واتوبيسات احيانا... فطبعا الامثلة هاتكون من تجربتى الاليمة فى وسائل الموصلات  :)

1. لما بكون قاعدة فى ميكروباص وتطلع واحدة ست علشان تقعد جنبى وتقوم رميا نفسها عليا وتقوم حشرانى وضغطانى فى نص المكان اللى كنت قاعدة فيه معتمدة اننا بنات يعنى زى بعض بجد ببقا نفسى اصوت فى وشها واقول حرااااااااااااااااااام يا ستى يا حبيبتى لازم وانت بتقعدى تاخدى بالك من البنى ادمين اللى جنبك مش علشان احنا بنات زى بعض يبقى من حقك تحشرينى فى مكانى بس للاسف انا بتكسف اقول حاجة زى دى وبخاف انى احرجها واجى على نفسى واتقوقظ فى مكانى وادعى ربنا يقصر المسافة

2. برضه فى الميكروباص لما يجى راجل يقعد جنبى فا بطبيعة الحال بوسع شوية علشان يكون بينى وبينه مسافة فتلاقيه فرد نفسه فى المسافة دى فبرضه ببقى نفسى اصوت فى وشه واقوله انا مش بوسع لسيادتك علشان تاخد راحتك لكن ما بقدرش اعمل كدا لان ماما ربنا يسامحها بقى مربيانا على ان اللى تكلم حد ما تعرفوش او تزعقله فى الشارع تبقى هيا اللى قليلة ادب وتستاهل اللى يجرى ليها فاخرى ابصله ودا على اساس ان الاحساس نعمة واقوم حاطة الشنطة علشان يحس على دمه

3. مرة فى اتوبيس كنت قاعدة فى الكرسى اللى بره - للعلم فقط انا مش بركب اتوبيسات الا لو هاقعد - وراجل كبير كان واقف جنبى او بمعنى ادق كان قاعد على كتفى واستجمعت قواى وقولته لو سمحت ممكن تبعد شوية قام مزعقلى وقالى "يعنى ايه يعنى ابعد واديكى وشى" وبجد انا لحد دلوقتى مش فاهمة ايه علاقة اللى قولتهولوا بانه يدينى وشه او قفاه

4. فى شباك التذاكر بتاع المترو لما يكون فى زحمة وقدامى راجل فطبعا ببقى سايبة بينى وبينه مسافة فا يجيلك واحد امور كدا او واحدة ويحشروا نفسهم فى النص وفى هذه الحالة لا املك الا ان اقول حسبى الله وابعد شوية 

5. لما يكون فى زحمة على محطة الميكروباص وييجى واحد وتلاقى الناس بتشوط فيك علشان تركب والله لما بلاقى زحمة مش بحاول اركب اصلا لكن بقى نقول ايه 

وبعد كل الكلام دا انا كل غرضى اقول اننا لازم واحنا ماشيين, واقفين, بنتكلم, او بنجرى حتى لازم تراعى المسافات بينا وبين الاخرين يعنى صاحبتى مش هاتكون زى صديقى وزميلتى مش هاتكون زى صاحبتى وزميلى مش زى زميلتى والناس اللى فى الشارع مش زى زميلى .......... المسافاااااااااااااااااااااااااااااااااااااااااااااااااااااااااات يا ناس